呢條影片係宣傳 YSD 公司嘅動畫製作服務。

影片嘅舖排直接，一開始就話動畫片係有效嘅宣傳方法，之後解釋動畫片嘅好處同說明用途，訊息明確。

成條片，我最鍾意火箭一幕，因為色調同 YSD 嘅 Logo 顏色相襯，望落舒服。另外就係字幕，字體四四方方，大路得嚟穩鎮，文字外框用上淺灰色，唔搶畫面。而字與字嘅間距，唔密唔疏，相當得宜。

有咁啱得咁橋，影片採用同呀 Bob 個 TVB 廣告一樣嘅背景音樂。背景音樂節奏快，切合影片略快嘅換場速度。音樂感覺 fun 得嚟有幽默感，TVB 廣告搵呀 Bob 襯托呢份幽默感，而呢條影片就搵上聲線有啲似曾志偉嘅旁白，加強 fun 同幽默。

整體嚟講，影片四平八穩，配搭得宜，舖排有序，訊息明確，係一條典型嘅宣傳片。