香港公開大學正式改名香港都會大學，校徽都換埋，舊校徽成個徽章圖案咁，家陣就取其校名 metropolitan university 的 mu 做新校徽。據稱，開會挑選新校徽時，46名與會者一致舉手贊成 mu 校徽，新校徽可算是眾望所歸。

新校徽設計師係 branding 大師 Alan Chan 陳幼堅，Alan 做咗 branding 50年，服務超過一千個品牌。見到「mu」時，佢即時諗起「me and you」，大家一齊做嘢和讀書，要分享，社會不是你或我的，是屬於大家。「me and you」亦啓動咗設計原素 progressive innovative diversity，年青社會具備的原素。而校徽的藍緑色，有青出於藍的意思，藍色和緑色中間加入切割位，是因為有人提出睇唔出 m 和 u 而加落去的。

新校徽都真係幾年輕和 innovative，令人想起廸士尼和 Pixar 的 3D 動畫 monsters university，動畫票房達 7.43 億美元。新校徽的顏色似緑草和天空，一個地一個天，代表遠距離，中間藍緑組合的形狀好像海馬游水飄洋過海，表達出長距離，「遙距」彷彿蘊含在新校徽當中，希望如校長林群聲所言，都大做好遥距課程。

有 YouTuber 表示，用字做 logo 好過用圖案，因為圖案較抽象，非 design 專業的人未必咁易明白。

都係，但又覺得，圖案可包多啲意思。例如地鐵 logo 咁，上半圓係九龍，下半圓係港島，中間垂直直線代表地鐵貫穿兩地。又如室內設計公司 San Marino，logo 幾個形狀拼埋一齊，好似單位平面圖咁，代表該公司乜單位都設計到。至於國泰 logo，似羽毛、鳥、飛機尾翼，又輕又識飛，瀟瀟灑灑，I believe I can fly，睇個 logo 都覺得間公司型。

logo 做圖案好，做字好，最重要解釋到設計來由，靚唔靚，各花入各眼，有無內涵，一般人望下就算，太執著可能適得其反。林群聲校長話鍾意新校徽簡單唔花巧，唔知「簡單唔花巧」，算唔算係大機構 logo 的共同特徵呢？